Tazones

El chigre restaurante La Tortuga asítiase nel barriu Samiguel de Tazones, a pocos pasos del puertu. Esti pueblu alcuéntrase a namás 10 km. de la cabeza de conceyu (La Villa) y a media hora de Xixón.

El cascu históricu de Tazones ta reconocíu como Bien d’Interés Cultural (BIC) cola categoría de Conxuntu Históricu, rescamplando la so arquitectura por caltener perfectamente la estructura de la villa marinera, con casines de corredor lliteralmente  colgaes de les estreches cais y siempre mirando pa la mar. El puertu, anguaño especializáu na pesca de baxura y que foi famosu pola pesca de ballenes y d’otres mercancíes que s’espardíen per dellos puertos d’España y d’Europa (Francia, Inglaterra y Holanda, ente otros países), caltién entovía una actividá curiosa, faciendo d’exe d’abondos establecimientos de turismu y hostelería qu’enllenen la cai principal.

Otros finxos del pueblu de Tazones son el faru (del añu 1854), la Casa de les Conches y la playa asitiada a la vera’l puertu y que cuenta con güelgues de dinosaurios.

Les fiestes de San Roque celébrense los díes 15, 16 y 17 d’agostu. Ye l’últimu día de les fiestes nel que se recrea, nel sentíu históricu el desembarcu, en 1517, l’emperador Carlos I procedente de Flandes. Esta fiesta ye considerada d’Interés Turísticu Rexonal.

L’aniciu del topónimu de Tazones taría, como desplica Xosé Lluis García Arias na so obra “Pueblos asturianos: el porqué de sus nombres”,  nel llatín Stationes (puertu).