Presentación

“La Tortuga” ye un restaurante familiar que lleva 48 años rexentáu por Maribel Alonso Gallego. Enantes de facese cargu d’él Maribel fue so madre, Aurora Gallego, la cabeza visible del negociu; si bien se trata d’un local hosteleru que ta fuertemente venceyáu cola propia historia de Tazones.

Asina, enantes de que se tresformare en casa de comides de la mano d’Aurora y Maribel, “La Tortuga” yera un chigre onde posaben los marineros a la vuelta de la mar a tomar sidra o vinu. Asina mesmo’l nome del local remítenos al nomatu d’un vieyu propietariu, del que cuenten que nuna ocasión pescó una tortuga, polo que lu llamaben “el de la tortuga”.

Si bien nestos años “La Tortuga” vien tresformándose hasta resultar un restaurante afayadizu pal visitante, el pesu de la so historia sigue dexando tastu en bien de detalles arquitectónicos, asina como nel fechu de que sigue siendo un sitiu de posa de la xente de Tazones, especialmente la xente de la mar.

Y ye precisamente esti puntu lo que fai de “La Tortuga” un restaurante especial, pues va tener accesu, nes diferentes époques del añu, a los productos más frescos que lleguen coles barques al puertu. Asina, caún de los pescaos y mariscos que se preparen con cariñu nes sos cocines, vienen del mesmu puertu que topamos andando unos pocos pasos.

Por esta razón nun ye raro que “La Tortuga” seya un local bien conocíu ente la xente que disfruta colos productos de la mar